100 Joer Gaart an Heem Nidderkuer – E Fest fir Traditioun, Gemeinschaft a Natur

Den 5. Oktober 2025 huet de Gaart an Heem Nidderkuer säin 100. Gebuertsdag gefeiert e bedeitende Moment fir d’Gemeinschaft vun Nidderkuer an all Frënn vum Gaardebau an der Naturverbonnenheet.

Feierlechkeeten 05. Oktober 2025  Mueres.

D’Festivitéiten hunn um 9:15 Auer ugefaangen mam Rendez-vous um Parking Arbed an der rue Pierre Gansen, wou e Shuttle Transfer d’Gäscht an Cité Jardinère vum Gaart an Heem Nidderkuer bruecht huet.

Trotz dem Reen, deen de Moien iwwer Nidderkuer erduerchgezunn ass, konnt um 10:00 Auer eng feierlech Mass an der Cité Jardinière ofgehale ginn. D’Gäscht hu sech net vum Wieder ofschrecke gelooss a sinn zesummekomm, fir dëse symbolesche Moment ze feieren e staarkt Zeeche fir de Zesummenhalt an d’Wäertschätzung vun der laanger Veräinsgeschicht. De Paschtouer, den Här  Yve Olinger, huet zesumme mat der Choral St. François d’Assise eng beréierend a musikalesch Mass zelebréiert. Hien huet duerch seng perséinlech Wierder der Feier eng déif spirituell Dimensioun ginn

Um 10:45 Auer gouf e Gedenksteen geseent – e Moment voller Symbolik an Emotioun. Dëse Steen steet als éiwegt Zeechen vun der Erënnerung un all eis verstuerwe Memberen, déi sech an de leschten 100 Joer mat Häerzblutt fir de Veräin agesat hunn. Mat hirem Engagement an Idealismus hu si dozou bäigedroen, d’Wäerter vum Gaart an Heem Nidderkuer héichzehalen an un déi nächst Generatiounen weiderzeginn. D’Ségnung war eng roueg an déifgräifend Éier fir hir Verdéngschter. 

Um 11:15 Auer huet de Cortège mat de  Veräiner an Sportshal gefouert. De Reen, deen d’Stëmmung net gedréckt, mee mat engem Hauch vu Melancholie verzaubert huet. D’Gäscht sinn, mat Schierm an Häerz, duerch d’Stroosse gezunn, begleet  vum Déifferdenger  Schäfferot  der Fanfare Nidderkuer an der Harmonie Municipale Déifferdeng, Der Chorale St. François d'Assise, den Déifferdenger Scouten, Memberen, a Frënn.  D’Melodien hunn sech mam Reen vermëscht, wéi eng Symphonie vun Traditioun. An der Präsenz vum Déifferdenger Schäffen a Gemengerot, dem Organisatiounscomité a villen Memberen a Frënn ass de Cortège zu engem festleche Moment ginn.

Nodeems de Cortège am Ree säi Wee duerch Nidderkuer gemaach hat, hunn sech d’Gäscht um 11:45 Auer an  der Nidderkuerer Sportshal versammelt – eng Plaz, wou d’Feier an engem gemittleche Kader konnt auskléngen. Bei engem Patt, de vun eiser Technescher Kommissioun zerwéiert gouf,  hunn sech d’Leit zesummefonnt, fir déi gemeinsam Momenter ze feieren an déi vill Geschichten aus 100 Joer Veräinsliewen ze deelen. D’Dekoratioun war einfach mee häerzlech, mat Blummen aus dem Gaart an Heem selwer.  Et war net nëmmen en Empfang – et war eng Erënnerung un d’Wichtegkeet vun Zesummenhalt, eng Feier vum Mënschlechen, an eng Invitatioun fir mat Hoffnung an d’Zukunft ze kucken. 

Merci un all déi dobäi waren an dëse Moment mat eis gedeelt hunn! 

Programm vum Mëtteg

Inspiréierender Virtrag

Um 16:00 Auer ass an der Nidderkuer Sportshal ee Virtrag vum Armand Logelin ofgehale ginn, mat dem spannenden Thema „Vun den Arbechtergäert bis bei de Gaart an d’Heem“. Dësen Virtrag huet ongeféier 45 bis 50 Minutte gedauert an d'Zuschauer op eng faszinéierend Rees duerch d’Geschicht an d’Entwécklung vun de Gäert gefouert.

De Virtrag gouf gehalen mat enger visueller PowerPoint-Show, déi vill intressant Biller an Dokumenter enthale huet. Duerch dës visuell Ënnerstëtzung konnten d'Gäscht d’Entwécklung vun den Arbechtergäert bis hin zu de modernen Gäert am Heem nach besser nachvollzéien.

Dëse Virtrag huet sech un all déi geriicht, déi sech fir d’Geschicht an d’Kultur ronderëm Gäert interesséieren – egal ob passionéierten Hobbygäertner oder Historiker. 

Den Heileit vun der Joresfeier war um 18 Auer mat der Séance Academique.

Nom inspiréierende Virtrag vum Armand Logelin goung den Dag weider mat engem räiche a variéierte akademesche Programm, dee speziell fir de Gaart an Heem Nidderkuer entworf gouf an huet vill Memberen, offiziell Gäscht a Gaardebegeeschterte  zesummebruecht.

Op der Bün waart de Mann, deen dëse speziellen Owend mat senger Stëmm begleede sollt: de François Meisch, de Moderator mat Häerz a Stil.
Hie war mat Charme a Präzisioun um Programm, huet d'Éieregäscht begréisst an d'Referenten virgestallt. Tëscht all Ried huet hien d'Museker an de Chouer virgestallt. 

Et ware vill bedeitend Perséinlechkeeten op der Plaz, déi dem Veräin mat hiren Rieden felicitéiert hunn. Derbäi waren d’Madamm Ministesch Martine Hansen, den Déifferdenger Buergermeeschter Här Guy Altmeisch souwéi d’Presidentin vun der CTF-Liga Lëtzebuerg, Madam Dr. Martine Mergen. Och den Organisatiounspresident Jean Lorgé an de Veräinspresident Jerry Haupert hunn mat hire Rieden d’Gäscht  begréisst an d’Bedeitung vum Jubiläum ervirgehuewen.

Fir eng passend festlech Stëmmung ze suergen, huet "d’Fanfare Nidderkuer" mat musikaleschen Interventioune, an de "Ensemble Vocal Vivace" mat senge Lidder fir flott Momenter gesuergt. Vill Memberen, Frënn a Bekannter waren der Invitatioun gefollegt a hunn zesumme mat de prominente Gäscht dës aussergewéinlech Feier genoss. 

Am Kader vun de rezent organiséierte Feierlechkeet huet den Organisatiounspresident no engem gelongene Programm déi gelueden Éieregäscht zu engem Éierewäin, de vun der Déifferdenger Gemeng offréiert war, invitéiert. Dës Traditioun stellt e wichtege Moment vum Austausch an der Unerkennung duer, wou d’Gäscht an enger feierlecher Atmosphär zesummekommen.

Besonnesch Opmierksamkeet krut de symboleschen Akt vum Opschneide vum Gebuertsdagskuch, deen offiziell am Kader vum Éierewäin duerchgefouert gouf. Dëse Gest war net nëmmen en Zeeche vun Dankbarkeet vis-à-vis vun den Éieregäscht, mee och e Moment vun Zesummenhalt. D’Organisatioun huet sech gefreet iwwer déi positiv Resonanz vun de Participanten an hält un der Traditioun fest, esou Momenter mat Wäert an Dignitéit ze gestalten.

D'Ausstellung "100 Joer - Gesiichter a Geschichten" mat historesche Fotoen.

Wärend dem ganze Festdag haten d'Gäscht d'Méiglechkeet, eng aussergewéinlech Fotoausstellung vum Arthur Wintringer ze entdecken. Dës Ausstellung stoung ënner dem Thema „100 Joer – Gesiichter a Geschichten“ a presentéiert eng Auswiel u historesche Fotoen, déi d'Entwécklung an d'Liewen vum Veräin am Laf vun engem Joerhonnert dokumentéieren.

D'Fotoen hunn net nëmmen d'Vergaangenheet erwächt, mee et gouf eng Rees duerch d'Zäit, wou d'Gesiichter vun eeleren an aktuelle Memberen, bedeitend Evenementer a besonnesch Momenter am Mëttelpunkt stoungen. D'Ausstellung huet domat zum gelongene Charakter vun der Joresfeier bäigedroen an d'Bedeitung vun der Geschicht fir déi aktuell Generatioun ënnerstrach.

 No der Seance Academique huet de Gaart an Heem op den éischte Stack an d'Buvette vun der Sportshal all Gäscht zu engem feierlechen Éierewäin  invitéiert, dee vun der Gemeng Déifferdeng offréiert gouf. Déi offiziell Éieregäscht, dorënner Madamm Ministesch Martine Hansen, de Buergermeeschter Guy Altmeisch an d'Presidentin vun der „CTF-Liga“, Dr. Martine Mergen, hunn zesummen de Gebuertsdagskuch ugeschnidden a sou de festleche Charakter vun der Joresfeier ënnerstrach. Dësen Empfang war eng flott Geleeënheet fir d'Gäscht, sech auszetauschen an d'Feier an enger gemittlecher Atmosphär auskléngen ze loossen.

Wärend dem ganze Festdag hu Lucien Koneczny an d’Madamm Sylvie Becker d’Verantwortung iwwerholl, déi wichtegst a schéinste Momenter op Fotoen festzehalen. Mat vill Engagement a grousser Opmierksamkeet hunn si de Verlaf vum Dag dokumentéiert, souwuel bei de verschiddenen Aktivitéiten wéi och bei de perséinlechen Begéinungen tëscht de Gäscht. Duerch hir Aarbecht si wäertvoll Erënnerungen un dësen aussergewéinlechen Dag fir de Gaart an Heem Nidderkuer entstanen, déi nach laang nogekuckt kënne ginn a fir d’Zukunft erhale bleiwen.